ILOILO – Nagwangal ang mga barangay official sang Mambog, Oton, Iloilo bangud sa mahinay nga pagresponde sang mga pulis sa natabo nga pagpangluthang sa ila lugar.
Ini ang kasunod sang pagpangluthang sang mister sa quarantine facility nga ginatiniran sang iya misis nga Overseas Filipino Worker (OFW).
Nag-angkon sang pilas sa abaga kag likod sang liog si Noli Legada nga amo ang gintunaan sang iya kamatayon, 55, kag isa ka barangay tanod sa nasambit nga lugar.
Samtang nag-angkon sang pilas sa abaga si Mylene Peronce, 27, kag live-in partner sang suspek nga si Melchor Amegable Jr., ginabanta 30 ang edad, utility sa isa ka ospital sa Molo, Iloilo City, pangayaw sa amo nga lugar kag tumandok sang Santo Tomas, Passi City.
Una nga ginluthang ang barangay tanod kag ginsunod naman ang misis.
Nahibaluan nga nagpakuno-kuno na lang nga patay ang misis agud indi na ini pag-ifinishing sang iya bana.
Samtang nagahamyangon sa katre nga duguon, nakita sang misis ang iya nga bana nga ginapang-ukay ang iya maleta kag ginkuha na ang iya cellphone kag kwarta.
Sang nabatyagan na sang misis nga nagpanaog na ang iya mister sa barangay hall kag nagsakay sa motorsiklo, diri ka nagsinggit na ini agud magpangayo sang tabang.
Sa exclusive interview sang Bombo Radyo kay Punong Barangay Vanessa Salinas, iya ginpahayag nga nagtawag sila sa Oton Search and Rescue Team (OSART) agud magbulig sa pagresponde sang insidente kag tawgon ang Oton Municipal Police Station.
Apang ginrason sang OSART nga may mga protocol pa nga ginasunod ang Oton Municipal Police Station.
Diri kag nag-ibwal si Salinas bangud apisar makapila ka beses na sila nga naghingyo sa OSART nga agyon nalang ang mga pulis, apang wala sa gihapon nag-abot ang mga otoridad.
Sang gin-usisa ni Salinas ang Oton Municipal Police Station, kun ngaa wala ang mga ini nagresponde, diri kag nagrason ang mga ini nga kuntani landline ang ila gintawgan sa baylo nga cellphone bangud wala ini sang ringtone.
Samtang, nagpanawagan naman si Salinas sa suspek nga atubangon ang krimen nga iya ginhimo.
Ginpahayag ni Salinas nga tuman siya ka dismayado bangud nagpadala ang suspek sa iya emosyon nga nagresulta sa pagkamatay sang Barangay Tanod kag pagkapilas sang iya misis.
Ginhangkat man ni Salinas ang suspek nga kun maissog ini, magsungka ini sa mga otoridad.
