“Grabe gid ang nabatyagan ko subong…sobra gid ang paghinulsol ko sa natabo sa pamilya ko.”
Nagaduko, naganguyngoy, kag mahinay ang tingog ni Melchor Amegable, Jr., 33, suspek sa pagluthang sa iya naka-quarantine nga live-in partner nga si Mylene Peronce, 27, kag pagluthang-patay sa barangay tanod nga si Noli Legada, 55, sa Barangay Mambog, Oton.
Matapos nahimo ang krimen 2:59 kaina sang aga, nagpalagyo si Amegable apang nagsungka man sang ulihi kag natigayon nga nakuha sang mga pulis sa Barangay Lambuyao sa amo nga banwa.
Sa interview sang Bombo Radyo kay Amegable, iya ginpahayag nga ‘nagpalangurog lang siya kag nadala sa balatyagon’ rason nga nahimo niya ang makangilidlis nga krimen.
Pahayag sang natungdan, tatlo ka tuig na ang iya live-in partner nga si Mylene sa Saudi Arabia kag amo man sini kalawig nga nasupot ang iya duda nga may iban nga karelasyon si Mylene bangud indi man maayo ang ila nga komunikasyon.
“Gin-block niya ako sa Messenger. Ang Facebook niya gin-private niya,” pahayag ni Melchor. “Siguro nahadlok man siya nga madakpan kun ano man ang ginatago ya sa akon.”
Sang nag-abot si Mylene diri sa Oton kag nagpaidalom sa quarantine, nagtinguha si Melchor nga makaistorya sa iya. “Nakita ko, ara ko sa bintana, may ginaistorya siya nga lalaki. Nakita ya man ako eh, pero galikaw siya sa akon,” panaysayon sang suspek. “Ga-blackout gid ang paminsaron ko sang amo ato nga tyempo.”
Apat ang bala sang 12 gauge shotgun nga dala ni Amegable, apang duha lang ang iya nga nagamit. “Wala na ko kabalo [kun sin-o ang una nga ginluthang]. Nagakurog ako, nagblackout ako.”
Pahayag ni Amegable, nagdalagan lang siya kag naglakat — wala siya nakahibalo kun paano siya nakaabot sa Lambuyao.
“Ang pusil ko wala ko kabalo kun diin ko nahaboy. Nagadalagan lang gid ko kag nagapanaw. Waay ako motor. Nagakurog ako.”
‘KUN NAKAISTORYAHANAY SILA SANG IYA LIVE-IN PARTNER….’
Kun may gamay lang nga kinalain sa sitwasyon…’kun natigayon lang nga nakaistorya si Melchor kag si Mylene’, pahayag sang suspek, ‘posible nga wala nagdangat sa pagpangluthang.’
“Madugay ko naman ni nga ginatago-tago ang problema ko para indi maapektuhan ang mga bata ko,” pahayag sang suspek nga nagatumod sa iya Grades 3 and 5 nga mga kabataan nga yara subong sa paghinakop sang iya nga pamilya sa Passi City.
Nagatrabaho si Melchor bilang utility sa Iloilo Doctors’ Hospital. “Ang mga ginikanan ko…damo naman nga problema ang naagyan nila, pero gusto ko man tani nga mangin pareho sa ila nga nalampuwasan nila ang mga problema. Gusto ko man lang tani nga mangin malipayon ang mga bata ko.”
‘PATAWARA LANG AKO’
Tubtob subong, indi man mapaathag ni Melchor kun ngaa nadalahig niya sa krimen ang barangay tanod nga nagabantay sa barangay hall nga amo ang nagaserbe nga quarantine facility.
“Gapangayo lang ako sang patawad. Gapangayo gid ako sang patawad. Nagblackout gid ako, gakurog ako,” mensahe ni Melchor sa pamilya sang napatay nga tanod kag sa pamilya sang natiruhan niya nga live in partner.May apelar man si Melchor sa mga tawo nga may kaluoy sa iya nadangtan subong.
“Gapangayo lang ko sang bulig sa inyo nga tanan…kun ano man ang mabulig ninyo. Grabe paghinulsol ko di. Indi man gid ako malain nga tawo. Indi gid ako malain nga tawo. Gusto ko man lang kuntani mabuhi sang tadlong,” dugang pa nga pahayag sang suspek.
Ginatinguhaan pa sang Bombo News Team nga kuhaan sang pahayag ang hepe sang Oton MPS may kaangtanan sa mangin dalagan sang kaso.
