Natukiban sa initial nga imbestigasyon sang National Bureau of Investigation (NBI) sa natabo nga shootout sa Quezon City nga nag-umpisa ang insidente sang nagpalupok ang armado nga mga lalaki sa mga agents sang Philippine Drug Enforcement Agency (PDEA) sa guwa sang isa ka fast food chain.
Sa closed circuit television (CCTV) footage sang fast food chain, makit-an nga nag-untat kag nagpark ang salakyan nga puti sa diin padulong kuntani sa buy-bust operation ang asset sang PDEA kag PDEA agent apang nag-overheat ang ila salakyan.
Ginbutangan nila ini sang tubig kag samtang ginakay-o ang salakyan, ginpalapitan sila sang mga armado nga lalaki kag gintiro ang asset sang PDEA sa diin natumba ini sa kilid sang kotse.
Nagpanaog ang iban pa nga mga PDEA agents sa salakyan kag natiruhan sini ang duha ka mga lalaki nga ginapahayag mga pulis sang Quezon City Police District (QCPD) Drug Enforcement Unit.
Pila man ka minuto nga nag-untat ang tiniruhay sa tunga sang PDEA kag PNP nga ginkumpirma sang NBI nga ang mga naka-engkwentro sang agents sang PDEA amo ang mga pulis ukon myembro sang QCPD.
Sa cellphone video naman sang isa sa mga testigo, makit-an ang PDEA Agent nga si Ranquin Gano nga nagalibot-libot sa area.
Ginpahayag sang PDEA agents sa NBIA nga sang ginpasakay na sa puti nga van ang ila asset bangud idul-ong kuntani ini sa ospital, liwat na naman sila ginpaulanan sang bala kag liwat natabo ang tiniruhay.
Pagkatapos ang masobra isa ka oras, napatay si PDEA agent Gano kag ang ila asset.
Sa panaysayon sang mga naistorya sang NBI, sang nag-abot ang reinforcement sang PDEA nga nagresponde sa crime scene, gilayon sila nga gindisarmahan kag ginsumbag sang mga ginaalegar pulis.
May yara sang authority to operate ang PDEA bilang pamatuod nga lehitimo ang operasyon samtang nagapanindugan man ang QCPD nga may yara sila sang kooperasyon sa PDEA sa paghiwat man sang buy-bust operation sa amo nga adlaw.
Gina-uyatan na subong sang NBI ang affidavit sang tatlo ka mga testigo nga lunsay sibilyan nga makabulig sa paghatag sang ka-klaruhan sa natabo nga shootout.
Nahibaluan nga kagab-i, ginsapol sa Malacañang ni Presidente Rodrigo Duterte sanday PNP Chief Debold Sinas, PDEA Director General Wilkins Villanueva, kag DOJ Secretary Menardo Guevarra agud istoryahan ang tuhoy sa PNP-PDEA shooting incident.
Yara man sa pagsinapol sanday Presidential Spokesperson Atty. Harry Roque kag Senador Bong Go.
