Ginpirmahan na agud mangin layi ni Presidente Rodrigo Duterte ang Vaccination Program Act of 2021 nga makapadasig sa rollout sang vaccination program sang pungsod batuk sa COVID-19.
Ang ini nga layi ang magahatag sang P500 million indemnity fund para sa mga indibidwal nga maka-eksperyensya sang adverse side effects matapos mabakunahan.
Ang layi ang may katuyuan nga likawan ang malawig nga proseso sang bidding agud mapadasig ang procurement sang bakuna.
Bwas, Pebrero 28, lauman nga ang 600,000 doses sang bakuna nga ginmanufacture sang Sinovac sang China ang magaabot na sa pungsod.
Sa sini nga numero, 100,000 doses ang ginpain para sa Philippine military.
Suno kay Presidential Spokesperson Atty. Harry Roque, kumpiyansa ang Duterte administration nga pinaagi sa pagpirma sang hagna nga mangin layi, ang makapadasig sa paghatag sang bakuna sa mga Filipinos bilang proteksyon batuk sa COVID-19.
Sa idalom sang layi, ang Department of Health (DOH) kag ang National Task Force Against COVID-19 (NTF) ang otorisado nga magdumala sa procurement sang COVID-19 vaccines amo man sa mga ancillary supplies kag services para sa storage, transport kag distribution.
