Maabot na subong nga adlaw, Pebrero 28 ang una nga batch sang Sinovac vaccines sa Pilipinas.
Ini nga mga bakuna ang labing una nga batch sang COVID-19 vaccines nga mabaton sang pungsod.
Suno kay Presidential Spokesperson Atty. Harry Roque, mismo ang mga government officials ang pisikal nga maga-welcome sa pag-abot sang madugay na nga ginahulat nga mga bakuna.
Una na nga ginpahayag ni Sinovac executive general manager Helen Yang nga ang una nga delivery ang ginalakipan sang 600,000 doses kag ini tanan ang lunsay donasyon sang China sa Pilipinas.
Sa sini nga numero, 100,000 doses ang naka-reserba na para sa Philippine Military.
Personal nga magatambong si Presidente Rodrigo Duterte sa seremonya kadungan sang pag-abot sang bakuna.
Pahayag naman ni Vaccine czar Carlito Galvez Jr., kinahanglan sang duha tubtob tatlo ka adlaw matapos ang pag-abot sang bakuna, mahatag na ang first dose sa mga yara sa priority list.
Nahibaluan nga ang Sinovac vaccine ang naaprubahan lang sang tinalikdan nga Lunes, Pebrero 22 para sa emergency use.
VC OF PRES SPOX ATTY HARRY ROQUE on duha (HARRY ROQUE)
Samtang gin-aprubahan mismo sang Inter-Agency Task Force on Emerging Infectious Diseases (IATF) ang rekomendasyon sang mga eksperto gikan sa National Immunization Technical Advisory Group (NITAG) kag Department of Health-Technical Advisory Group (TAG) nga gamiton ang Sinovac para sa mga healthcare workers.
Paathag ni Roque, kun indi luyag sang healthcare worker sang Sinovac, mahimo man siya nga mangindi nga wala nagakaapektuhan ang priority status sa tion nga mag-abot na ang nahamut-an sini nga bakuna.
Apang para lamang ini sa mga healthcare workers dugang pa ni Roque.
