ILOILO CITY – Nanuhay-tuhay ang reaksyon sang mga manunudlo kag opisyal sang Department of Education sa Iloilo may kaangtanan sa ginaduso nga pagbalik na sang face-to-face classes sa pungsod.
Sa interview sang Bombo Radyo kay Dr. Nicasio Valenzuela, division sports coordinator sang DepEd-Iloilo, iya ginpahayag nga sa mga nabaw-ing nga lugar sa probinsya sang Iloilo, indi bastante ang printed modules agud nga mahatag sa mga estudyante ang ila nga mga leksyon.
Apisar ginapahanumdom sa mga manunudlo nga indi gid pag-i-buwis ang ila kabuhi sa mga malayo nga mga lugar, may yara gihapon sang mga manunudlo nga nagausoy gid sa malayo nga mga dalan agud lamang mabisita ang mga estudyante.
Sa bulig sang mga bakuna, nagalaum ang natungdan nga maimplementar na liwat ang in-person ukon face-to-face instruction kag matun-an na ini sang gobyerno.
Suno naman kay Dr. Nestor Paul Pingil, Education Program Supervisor in English sa Deped Region VI, dapat na nga i-adapt sa sistema sang edukasyon sang Pilipinas ang blended learning.
Maayo suno sa natungdan kun mabalik na ang face to face nga klase bangud mangin maayo ang interaction sang manunudlo kag estudyante, apang indi na dapat pagdulaon ang blended learning bangud kabahin ini sang alternative delivery mode.
Ang blended learning suno kay Pingil ang pabor para sa mga working students ukon may kumplikado nga class schedules.
May pandemya man ukon wala, kinahanglan na ini suno sa natungdan agud nga mapauwag ang education system sa Pilipinas.
Suno naman kay JP Peñol, Chief Operating Officer sang Iloilo Merchant Marine School, dapat nga prayoridad sa gihapon ang safety sang stakeholders, manunudlo, kag estudyante.
Subong nga wala pa nag-umpisa ang vaccination, mas maayo suno kay Peñol nga magtinir lang anay sa blended learning sa kondisyon nga gina-provide lang sa academe ang mga material nga kinahanglanon para sa instruction.
Sa bahin naman sang Iloilo Merchant Marine School, ginpahayag ni Peñol nga 100% nga handa na sila sa limited face to face classes apang ginahulat na lang ang guidelines kag desisyon sang national government.
