ILOILO CITY- Ginhangkat sang isa ka human rights group ang Criminal Investigation and Detection Group (CIDG) nga magpatigayon sang ila kaugalingon nga imbestigasyon bangud sa pag-angot sa ahensya sa pagpatay sa kontrobersyal nga si Punong Barangay Julie Catamin sang Barangay Roosevelt, Tapaz, Capiz.
Sa interview sang Bombo Radyo kay Reyland Vergara, secretary-general sang Karapatan, iya ginpahayag nga base sa pahayag sang mga residente sang Barangay Roosevelt, antes ginpatay si Catamin, may mga nagpakilala nga katapo sang CIDG nga nagapangita sa biktima.
Suno kay Vergara, may isa man ka katapo sang Philippine Army nga ginkilala nga si certain “Lieutenant Estrada” nga nagpatawag sa barangay chairman sa military detachment sa Haycon, Calinog, Iloilo sang Pebrero 25 agud istoryahon nga untaton na sini ang pagpangayo sang bulig sa Bayan Muna kag sa simbahang katolika.
May kaangtanan ini sa kaso nga ginpasaka batok sa pila ka pumuluyo sang Brgy. Roosevelt kasunod sang natabo nga synchronized operation sang PNP kag Philippine Army sang Disyembre 30 nga ginkamatay sang 9 ka mga ginapatihan katapo sang rebelde nga grupo sa diin nanindugan si Catamin nga planted lang ang mga ebidensya batok sa mga biktima kag sa mga ginpang-aresto nga mga pumuluyo.
Dugang pa ni Vergara, kinahanglan nga tinluan sang duha ka ahensya ang ila mga imahe agud nga mapamatud-an nila nga wala sang kahilabtanan ang CIDG kag Philippine Army sa kamatayon sang punong barangay.
