CALINOG, ILOILO – Yara na sa kustodiya sang mga otoridad ang basiyo sang bala nga gingamit sang mga suspek nga nagluthang-patay sa kontrobersyal nga punong barangay sang Roosevelt, Tapaz, Capiz.
Ang biktima amo si Julie Catamin, 49, kag nag-angkon sang pilas sa likod nga amo ang gintunaan sang iya kamatayon.
Si Catamin ang naghalin sa isa ka namatyan sa Malitbog Ilaya, Bingawan Iloilo kay pauli na kuntani sa Tapaz, Capiz sang ginluthang sang riding in tandem suspects sa Malitbog Centro, Calinog, Iloilo.
Sa interview sang Bombo Radyo kay Lt. Jorge Lenantud, deputy chief of Police sang Calinog Municipal Police Station, iya ginpahayag nga apat ka empty shells sang .45 caliber pistol ang ila narekober sa crime scene.
Magluwas sini, nakarekober man ang Scene of the Crime Operation (SOCO) sang isa ka bala sang .45 caliber pistol nga wala naglupok.
Sa subong, ang nasambit nga mga recoveries ang yara na sang kustodiya sang Calinog Municipal Police Station.
Duha ka suspek sa gihapon ang ginapangita sang mga otoridad nga amo ang ginatukod nagpangamot sa krimen.
Wala naman sang witness sa pagpatay kay Catamin.
Ginkumpirma man ni Lenantud nga padayon pa sila nga nagapakig-angot sa pamilya sang Punong Barangay agud magbulig sa ila imbestigasyon.
Nahibaluan nga nakita man sa closed circuit television (CCTV) camera ang isa ka puti nga van nga ginapatihan ginsakyan sang mga lookout sang suspek nga nagpatay kay Catamin.
