Hugot nga ginapakamalaot sang Simbahang Katolika ang pagluthang-patay sa kontrobersyal nga Punong Barangay sang Roosevelt, Tapaz, Capiz.
Ang biktima amo si Punong Barangay Julie Catamin, 49, kag nag-angkon sang patal nga pilas sa likod nga amo ang gintunaan sang iya kamatayon.
Si Catamin ang naghalin sa bilasyunan sa Badiangan, Iloilo kag pauli na kuntani sa Tapaz, Capiz sang ginluthang sang riding-in-tandem suspects samtang sakay ini sa motorsiklo sa Malitbog Centro, Calinog, Iloilo.
Sa interview sang Bombo Radyo kay Msgr. Meliton Oso, director sang Jaro Archdiocesan Social Action Center (JASAC), iya ginpahayag nga nagakadapat nga resputuhon ang kabuhi kag kinamatarong sang isa ka tawo.
Suno kay Oso, kuntani masolbar gilayon ang kaso agud mahatagan sang hustisya si Catamin.
Pebrero 25, sang ginpatawag si Catamin sa kampo sang 61st Infantry Battalion (IB) sa Brgy. Libot, Calinog, Iloilo kag ginpaandaman nga indi magpangayo sang bulig sa mga Bayan Muna lawyers kag sa Simbahang Katolika.
Si Catamin ang nainterview naman sang Bombo Radyo Iloilo matapos ang insidente sa diin ginpanindugan sini nga ginplantedan sang mga otoridad ang iya mga pumuluyo.
Magluwas sa Simbahang Katolika, ginkasubo man sang Philippine Army ang pagluthang-patay kay Catamin.
