Safely, slowly but surely, ini ang hugot nga ginaduso sang Department of Tourism (DOT) Region VI sa pagbukas sang turismo sa Western Visayas.
Sa interview sang Bombo Radyo kay Atty. Helen Catalbas, director sang DOT Region VI, iya ginpahayag nga apisar nagasuporta ang DOT sa pagpasimple sang travel requirements kag procedures sang National Inter-Agency Task Force (IATF) agud mabatak ang ekonomiya sa turismo, nagapati siya nga nagakadapat man nga unahon ang ikaayong lawas sang mga tawo.
”Ang aton iya stand dira, nga we should promote tourism but we should protect the health and well being and safety sang aton mga pumuluyo, sang aton mga turista kag sang aton mga tourism workers. So tatlo ini ka grupo sang mga indibidwal kag mga tawo ang dapat naton protektahan while we are promoting tourism.”
Indi man pwede suno sa iya ang gilayon nga pagdula sang tanan nga health protocols kun mapatuman na ang resolution 101 sang National IATF sa Western Visayas.
Ginpahayag ni Catalbas nga ginatugyan na niya sa mga local chief executives sang kada Local Government Unit (LGUs) sa Western Visayas ang paghatag sang pagsulundan natuhoy sa travel procedures.
”We do not like nga ang turismo mismo nga siya ang economic driver sang Western Visayas prior to COVID-19, amo man siya ang mangin alagyan sa pagdamo sang balatianon sa aton nga rehiyon. So there should be a well balanced approach to the opening of tourism destination and I believe that the local chief executives of six provinces and two highly urbanized cities of Western Visayas realize this. That is why ginatun-an gid ini nila maayo.”
Suno naman kay Mr. Gilbert Bombette Marin, Provincial Tourism Officer sa Province of Iloilo, indi kompetisyon sa Western Visayas ang pagpasangkad sang turismo.
Gin-athag niya nga ang ila ginaduso amo ang mangin ‘safe’ ang tanan nga turista sa pagbisita sa probinsya sang Iloilo.
Kadungan sini, nagpangabay man si Marin sa mga travelers nga mangin ‘wise’ sa pagsunod sang safety protocols agud malikawan ang COVID-19.
Suno naman ka Mr. Alphonsus Tesoro, pinuno sang Capiz Provincial Tourism kag Cultural Affairs Office, may yara sang tourism circuit ang Western Visayas.
Buot silingon suno sa iya, nagalibot ang mga turista indi lamang agud maeksperyensyahan ang isa ka probinsya kundi ang kabug-usan sang Western Visayas.
Nagabuligay suno sa natungdan ang bilog nga Western Visayas agud nga mapromote ang turismo samtang wala ginakompromiso ang safety sang tanan.
Suno naman kay Liberty Ferrer, Guimaras Senior Tourism Operations Officer kag officer-in-charge sang Provincial Tourism Office (PTO), ang kada probinsya sa Western Visayas ang may ‘unique selling point’.
Nagakadapat lamang suno sa iya nga sa tunga sang mga pagpanghangkat bangud sa COVID-19 pandemic, mas maayo nga mapadayon ang pagbuligay sang mga probinsya sang Western Visayas sa pagpromote sang turismo.
Suno naman kay Gil Delos Santos, Malay-Aklan Tourism Information Officer, ini na ang pinaka ‘the best time’ nga magbisita ang mga turista sa isla sang Boracay.
Ginpahayag ni Delos Santos nga apisar sang mga ka-kompetensya sang Isla, mas nagsangkad na subong ang katahum sang Boracay kun ikumpara sang una.
Nagalaom man ang natungdan nga mapadayon sang Boracay ang pagbangon sang ekonomiya bangud dako ang kontribusyon sini sa turismo sang Western Visayas ilabi na sa Pilipinas.
