Amat-amat na nga nagabangon ang turismo sa probinsya sang Guimaras.
Sa interview sang Bombo Radyo kay Liberty Ferrer, Guimaras Senior Tourism Operations Officer kag officer-in-charge sang Provincial Tourism Office , iya ginpahayag nga umpisa sang sea tragedy sang Agusto 3 2019 sa isla sang Guimaras, nangin istrikto na ang travel protocols sa probinsya.
Apang apisar sini suno kay Ferrer, ginpakamaayo sang probinsya nga pasanyugon pa ang turismo pinaagi sa pagpasigurado sang ‘safety’ sang tanan nga nagabisita sa Guimaras ilabi na subong sa tunga sang COVID-19 pandemic.
Suno kay Ferrer, nagapasalamat sila nga wala man nagauntat ang development sang farm tourism sa probinsya.
Magluwas diri, naglunsyar man sang inisyatibo ang mga tour guides sang Guimaras pinaagi sa pagpost sa social media sang ila mga virtual tour.
Ginaplanuhan man suno sa iya nga magamit sa gihapon ang mga phase-out wooden hulled pumpboat sa turismo.
Nagapadayon man suno kay Ferrer ang nanuhay-tuhay nga bike activities sa Guimaras sa diin nagapakigbahin ang mga biker sa Western Visayas.
Sa subong suno sa natungdan, wala sila nagauntat sa pagpahanumdom sa mga accommodation establishments nga mag-angkon sang Certificate of Authority nga ginmando sang Department of Tourism.
