Naglain ang uso sa patag sang turismo sang nag-umpisa ang COVID-19 pandemic.
Sa interview sang Bombo Radyo kay Mr. Gilbert Bombette Marin, Provincial Tourism Officer sa Province of Iloilo, iya ginpahayag nga kun sang una, ang masami nga ginakadtuan sang mga local travelers amo ang mga resorts sa probinsya, sa subong madamo na sang nadiskubrehan ang mga turista, kaangay sang nanuhay-tuhay nga farm, mountainous areas kag maragtason nga mga lugar.
Suno kay Marin, apisar indi magnubo sa P15 billion ang napirde sa turismo sang probinsya sang Iloilo sang nag-umpisa ang pandemya, wala sa gihapon nadulaan sang paglaom ang pila ka mga negosyo nga magbangon kag mas panamion ang serbisyo.
Bangud man diri, ginpahayag ni Marin nga padayon ang ila paglibot sa probinsya agud mapahanumduman ang mga accommodation establishments nga wala pa sang Certificate of Authority to operate sa tunga sang COVID-19 pandemic.
Dugang pa niya, nagapadayon man ang ila kampanya sa programa sang Department of Interior and Local Government (DILG) kag Department of Tourism (DOT) nga ang tanan nga Local Government Unit sang probinsya sang Iloilo ang magbalay sang tagsa ka Tourism Development Plan.
Ginpahayag sang natungdan nga humalin sang Nobyembre sang nagligad nga tuig, may 12 na ka mga munisipalidad ang nakaumpisa na sa paghimo sang ila Tourism Development Plan.
Sa pagpatuman naman sang Resolution Number 101 nga ginpapanaog sang National Inter-Agency Task Force (IATF) agud nga mapasimple ang travel requirements, protocols, kag procedures, gin-ako ni Marin nga ginahulat nalang nila ang Executive Order ni Iloilo Governor Arthur Defensor Jr.
