Suportado sang Department of Tourism (DOT) Region VI, ang ginhimo sang National Inter-Agency Task Force (IATF) nga pagpasimple sang travel requirements, protocols, kag procedures bangud mas maengganyo sini ang mga turista nga magpadulong sa mga tourist destinations sa Pilipinas ilabi na sa Western Visayas.
Santo sa Resolution Number 101 nga gin-isyu sang IATF sang Pebrero 26, indi na mandatory ang pila ka mga health protocol sa pagtravel apang nagadepende sa Local Government Unit (LGU)-point of destination kun i-require ang COVID-19 testing kag quarantine.
Sa interview sang Bombo Radyo kay Atty. Helen Catalbas, director sang DOT Region VI, iya ginpahayag nga ginakonsidera na sang Western Visayas ang pagsulundan sang IATF.
Ginpahayag ni Catalbas, nga ginhatagan sang duha ka semana ang mga local chief executives sang mga probinsya kag highly urbanized cities sa Western Visayas agud magsunod sa nasambit nga resolution.
Apang sa subong, gin-athag ni Catalbas nga nagapabilin sa ‘status quo’ ang Western Visayas natuhoy sa travel procedures kag restrictions.
SA SITWASYON SANG TURISMO SA WESTERN VISAYAS
Amat-amat na nga nagabaskog ang turismo sa Western Visayas.
Suno kay Catalbas, ila na-obserbahan nga kalabanan sa mga ‘leisure travelers’ ang nagagamit sang ila private ukon family vehicles bangud sa COVID-19 pandemic.
Diri kag napat-od sang DOT nga ang mayor nga luyag sang mga turista amo ang ‘safety’ sa pagtravel.
Ini man ang rason nga nagmando ang DOT sang nagligad nga tuig sa tanan nga accommodation establishments nga magkuha sang Certificate of Authority agud maka-operate sa tunga sang pandemya.
Dugang pa sang natungdan, ang tanan nga DOT accredited establishments nga ginalakipan sang mga restaurant, resort, hotel kag iban pa, ang ginatugutan sang 50 percent operational capacity.
