ILOILO – Nagdepensa ang Iloilo Police Provincial Office (IPPO) tuhoy sa reklamo batok sa Oton Municipal Police Station bangod sa atrasado nga pagresponde sa pagpangluthang sa quarantine facility sa Brgy. Mambog, Oton, Iloilo.
Sa exclusive interview sang Bombo Radyo kay IPPO Director Pol. Col. Gilbert Gorero, iya ginpahayag nga nakapatigayon na sila sang imbestigasyon natuhoy sa reklamo ni Punong Barangay Vanessa Salinas nga wala may nagasabat sa cellphone kag halos isa ka oras pa nagresponde ang Oton Municipal Police Station sa insidente.
Suno kay Gorero, wala niya ginakumpormihan ang pahayag ni Salinas nga naglab-ot sa isa ka oras antes nagresponde ang pulis sa crime scene.
Ginpahayag ni Gorero nga indi isyu ang oras ukon ang indi pagsabat sa cellphone, sa baylo ang kapaltahan sang Oton Municipal Police Station amo ang delayed nga pagresponde.
Santo sa call log, 15 tubtob 20 minutos matapos nagtawag si Punong Barangay Salinas sa Oton Municipal Police Station, gilayon man ang mga ini nga nagpadulong sa gintabuan sang insidente.
Ginapangayuan naman sang written explanation ni Gorero ang hepe sang Oton Municipal Police Station nga si Pol. Captain Robert Jayson Pancha kaangot sa reklamo.
