ILOILO – Liwat na naman nga ginreklamo ang Oton Municipal Police Station matapos nga wala sang may nag-atubang nga pulis sang nagpangayo sang bulig ang isa ka babayi.
Sa Facebook post ni Roxane Varona, iya ginreklamo bangud sang nagpadulong siya sa Oton Municipal Police Station, nakibot siya bangud wala sang tawo nga nag-atubang sa iya kag ginrason nga naglunch break ang mga ini.
Magluwas sini, ginrason man sang mga pulis nga masako sila bangud masobra 50 ka tawo ang ila ginhatagan sang travel authority kag police clearance.
Ginrason man sang mga pulis nga wala nakapanyaga ang in-charge nga Non-Uniformed Personnel (NUP) kag ang iban nga pulis ang may ginpasa nga report sa Iloilo Police Provincial Office (IPPO) kag may nagtambong man sa pagsinapol sa AKAP KAPATID sa isa ka restaurant sa Trapiche, Oton, Iloilo.
Kaangot sini, ginpahayag ni IPPO Director Pol. Col. Gilbert Gorero nga halos 50 percent sang mga personnel sang Oton Municipal Police Station ang naka quarantine rason nga gamay lang ang tawo sa istasyon.
Apang suno kay Gorero, sa tion nga magkaon, nagakadapat nga may bilin gid nga police personnel sa istasyon agud mag-atubang sa mga tagreklamo kag magsabat sa mga tawag.
