ILOILO CITY – Naghingyo si Iloilo City Mayor Jerry Treñas kay Vaccine Czar Carlito Galvez Jr. nga painan ang mga health worker sa syudad sang Sinovac vaccine nga gin-order halin sa China.
Sa interview sang Bombo Radyo kay Treñas, iya ginpahayag nga nag-order ang Pilipinas sang P1 million ka doses sang Sinovac vaccines.
Ini nga mga bakuna ang magluwas pa sa P600,000 ka mga Sinovac vaccine nga gindonar sang China sa Pilipinas nga nag-abot sang Dominggo.
Suno sa alkalde, gintugyan siya ni Galvez kay Department of Health Undersecretary Dr. Myrna Cabotaje.
Diri kag naistoryahan nanday Treñas kag Cabotaje nga sa tion nga mag-abot na ang ginbakal nga Sinovac vaccine, sigurado nga mapainan ang Western Visayas sa diin nahamtang ang Iloilo.
Apang sa subong, wala pa sang pat-od kun san-o ini maabot.
Samtang, wala pa sang pinal nga desisyon ang Iloilo City Government tuhoy sa pagbakal sang Janssen COVID-19 vaccine kag Sputnik V vaccine.
