ILOILO CITY- Ginpalukpan sang Improvised Explosive Device ang advance party ni Iloilo Governor Arthur Defensor Jr. sa Brgy. Canawili, Janiuay, Iloilo.
Sa interview sang Bombo Radyo kay Governor Defensor, iya ginpahayag nga nagapatigayon sang clearing operation/ road security operation para sa groundbreaking sang Agro Forestry Support Facility sub project sa Brgy Panuran, Janiuay, Iloilo, sang naglupok ang IED sa bahin sang Barangay Canawili.
Wala naman sang may napilasan sa insidente.
Narekober sa lugar ang isa ka IED malapit sa area sang pagsigabong.
Nahibaluan nga natalana kuntani nga magpadulong ang gobernador sa amo nga barangay para magtambong sa inagurasyon apang wala nadayon ang iya paglakat bangod nga bag-o lang ini nakaabot halin sa Manila kag ginpakamaayo nga indi anay makigsimpon sa mga tawo.
Indi naman mahambal sang gobernador kon siya gid man ang target apang suno sa iya, ginakondena niya ini kag wala sang lugar sa Iloilo ang ini nga sahi sang pagpang-atake.
