ILOILO CITY – Nangin madinalag-on ang Simulation Exercises (SIMEX) sa syudad sang Iloilo nga ginpatigayon subong nga adlaw, sa Ateneo de Iloílo-Sta. Maria Catholic School.
Sa interview sang Bombo Radyo kay Iloilo City Mayor Jerry Treñas, iya ginpahayag nga gintutukan ang mga pumuluyo sang Distrito sang Mandurriao sa nasambit nga SIMEX.
Ginkalipay man sang alkalde nga nangin matalunsay ang SIMEX sa diin nagdangat lamang sa 10 ka minutos ang pagpabakuna sang kada tawo.
Gin-ako ni Treñas nga sa tion nga mag-abot na ang ginbakal nga COVID-19 Vaccines sa Iloilo City, nakahanda na ang syudad sa Vaccination.
Matapos ang mga SIMEX, masunod naman nga tutukan sang Iloilo City Government ang paghitso sa tanan nga equipment sa patigayunon nga COVID-19 Vaccination.
