ILOILO – Nagpatigayon na sang kaugalingon nga imbestigasyon si Oton, Iloilo Mayor Atty. Carina Flores tuhoy sa kapaltahan sang Oton Municipal Police Station nga magresponde sa natabo nga pagpangluthang sa quarantine facility sa Brgy. Mambog, Oton, Iloilo.
Sa interview sang Bombo Radyo kay Flores, iya ginpahayag nga makigkita pa ini kay Punong Barangay Vanessa Salinas sang Mambog, Oton, Iloilo nga amo man ang presidente sang Association on Barangay Captain (ABC) kag sa hepe sang Oton Municipal Police Station nga si Pol. Captain Robert Jayson Pancha.
Suno kay Flores, gintugyan naman niya sa Committee on Peace and Order sa Sangguniang Bayan ang reklamo ni Salinas batok sa Oton Municipal Police Station.
Matandaan nga ginreklamo ni Salinas nga wala sang may nagasabat sa cellphone sang Oton Munucipal Police Station sang nagpangayo ini sang bulig kag halos isa ka oras pa kag nagrespondene sa insidente sa diin isa ka barangay tanod ang napatay kag isa ka babaye ang kritikal matapos ginpangluthang sang shotgun.
SA REKLAMO SA OTON MPS
Samtang kaangot naman sa reklamo sang isa niya ka residente nga wala sang tawo ang Oton Municipal Police Station, ginpahayag ni Flores nga indi dapat pag-irason ang paglunch break.
Matandaan nga sa Facebook post ni Roxane Varona, iya ginreklamo bangud sang nagpadulong siya sa Oton Municipal Police Station, nakibot siya bangud wala sang tawo nga nag-atubang sa iya kag ginrason nga naglunch break ang mga ini.
Magluwas sini, ginrason man sang mga pulis nga masako sila bangud masobra 50 ka tawo ang ila ginhatagan sang travel authority kag police clearance.
Ginrason man sang mga pulis nga wala nakapanyaga ang in-charge nga Non-Uniformed Personnel (NUP) kag ang iban nga pulis ang may ginpasa nga report sa Iloilo Police Provincial Office (IPPO) kag may nagtambong man sa pagsinapol sa AKAP KAPATID sa isa ka restaurant sa Trapiche, Oton, Iloilo.
Suno kay Flores, kulang gid man ang mga pulis sa ila banwa.
Sa pagkamatuod suno sa alkalde, makapila na siya ka beses nga naghingyo sa Iloilo Police Provincial Office (IPPO) nga dugangan ang ila mga pulis apang ginhatagan lang sila sang augmentation kag sa ulihi ginapabalik man sa kampo.
Apang gin-athag ni Flores nga indi ini dapat pag-irason sang mga pulis agud indi pagtungdan ang ila nga trabaho.
