ILOILO CITY- Gin-akusahan sang National Union of People’s Lawyers (NUPL) ang Philippine National Police kag Philippine Army nga amo ang sa likod sang pagbuno kay NUPL-Visayas Asst. Vice President kag NUPL-Panay Sec-Gen Atty. Angelo Karlo Guillen.
Sa interview sang Bombo Radyo kay Atty. Teopisto Melliza, spokesperson sang NUPL, iya ginpahayag nga state forces kag wala na sang iban ang may motibo sa pagtuyo sa kabuhi sang abogado bangod sa PNP kag Philippine Army man naghalin ang mga pagpamahog.
Suno kay Atty. Melliza, posible nga may kaangtanan ang insidente sa pagtindog ni Guillen nga abogado para sa mga napatay sa kontroberysal nga operasyon sang PNP kag Philippine Army sa Tapaz, Capiz kag abogado man ini sang 16 nga mga ginpang-aresto sa amo man nga operasyon.
Magluwas diri, abogado man si Guillen sang mga political detainees sa Negros Occidental kag isa man ini sa mga abogado sa likod sang petisyon batok sa kontrobersyal nga anti-terror law.
Pahayag pa ni Melliza, screwdriver lang ang gin-gamit sa pagbuno sa biktima agud patalangon ang publiko nga ordinaryo lang ini nga krimen nga pagpangawat lang ang motibo.
Nahibaluan nga ginkuha sang duha ka mga suspek ang bag nga dala ni Guillen nga nagaunod sang laptop kag mga dokumento nga posible nagaunod sang mga detalye kag impormasyon sa mga kaso nga iya ginauyatan.
