Nagaugyon ang mga alkalde sa mga banwa sa probinsya sang Iloilo nga kinahanglan gihapon ang quarantine kag COVID-19 testing para sa mga locally stranded individuals, returning Overseas Filipino, kag authorized persons outside residence nga magaabot sa probinsya.
Ini ang reaskyon nga nakuha ni Governor Arthur Defensor Jr. matapos ang ginpatigayon nga zoom meeting kaupod sa mga alkalde.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga nagapanigurado man ang mga alkalde bangud indi nila luyag nga magtimbuok ang kaso sang COVID-19 kun pasugtan lang nga makasulod apisar wala sang swab test kag wala sang quarantine ang mga tawo nga halin sa mga lugar nga may mataas pa nga kaso sang nasambit nga balatian.
Sa subong suno kay Mamon, ginahitso na ni Gov. Defensor ang Executive Order agud ipatuman ang Inter-Agency Task Force Resolution 101 may kaangtanan sa palareho nga travel protocols sang local government units.
Nahibaluan nga sa idalom sang Uniform Travel Procols nga gin-aprubahan sang Inter-Agency Task Force, may ligwa gihapon ang LGU-point of destination nga makadesisyon kun i-require ang quarantine kag swab test.
Indi naman requirement ang travel authority gikan sa Philippine National Police kag ang medical certificate gikan sa LGU health office kun mag-biyahe.
Samtang wala pa nahitso ini tanan nga pagsulundan, status quo ukon magapabilin sa gihapon ang travel requirements para sa magapauli nga LSIs, ROF, kag APOR sa probinsya sang Iloilo.
