May yara na naman sang maabot nga dugang nga 38, 400 doses sang COVID-19 vaccine nga gindevelop sang British-Swedish drug firm nga AstraZeneca subong nga adlaw paagi sa COVAX facility sa gihapon.
Ini ang ginkumpirma ni vaccine czar Secretary Carlito Galvez.
Suno sa iya, ang nabilin sa 525,600 shots sa idalom sang initial COVAX allocation para sa Pilipinas ang maabot las 7 sang gab-i.
Nahibaluan nga ang una nga batch nga may 487,200 shots ang nag-abot sa pungsod sang Huwebes.
Sang Lunes, Marso 1 kuntani ang abot sang AstraZeneca vaccine sa pungsod apang ini ang na-postpone bangud sa limitado nga supply kag natigayon lamang nga madeliver sang Marso 4.
Una na nga ginpahayag ni World Health Organization (WHO) representative to the Philippines Rabindra Abeyasinghe nga lauman nga may yara sang dugang nga 4.5 million doses sang AstraZeneca ang maabot sa Mayo pinaagi sa COVAX facility.
Ang pag-abot sang AstraZeneca vaccines sa pungsod ang ika-duha na nga batch sang bakuna matapos ang pagdeliver sang Sinovac China-made vaccines.
