Liwat nga nagbalik ang mga anti-coup demonstrators sa mga dalanon sang Myanmar, isa ka adlaw matapos nagpanawagan ang United Nations sa Security Council nga pamatian ang apela sang mga pumuluyo sang pungsod kag himuan sang pamaagi nga ibalik ang demokrasya.
Pebrero 1 sang na-eskperyensyahan na ang komusyon sa nasambit nga pungsod matapos ginkuhaan sang gahom ang civilian leader nga si Aug San Suu Kyi nga nagresulta sang kaakig sa madamo nga mga tawo batuk sa mga pulis kag militar.
Apisar masobra 50 na ka mga tawo ang napatay sa Myanmar bangud sa pagpakigbato sang demokrasya, wala nalingkang ang mga protesters kag liwat nga nagpartisipar sa hublag protesta.
Tuman nga apektado ang Myanmar sa nagakatabo subong sa pungsod sa diin ang mga banko ang wala na naka-operate, sirado ang mga ospital kag wala naman sang tawo sa mga ministry offices.
Nagpalupok sang tear gas kag granada ang security forces agud nga indi magtipon ang mga protesters kag gingamitan man sang bulldozers ang mga barikada sang protesters.
