Mahimo na makatipon-tipon nga wala sang ginasuksok nga face mask kag wala sang ginasunod nga physical distancing ang mga tawo nga may yara na sang COVID-19 full vaccination sa Estados Unidos.
Ini ang nakasaad sa guidelines nga ginpagwa sang US Centers for Disease Control and Prevention (CDC).
Suno kay CDC Director Dr Rochelle Walensky, katuyuan sang gin-release nga guidelines nga makabalik na ang mga tawo sa ordinaryo nga mga hilikuton nga luyag nila himuon.
Sa amo man nga guidelines, ginapahanugutan na ang mga tawo nga nakakumpleto patublok sang COVID-19 vaccine nga himuon ang mga masunod:
- pagbisita sa iban nga nakapabakuna man nga mga tawo apisar wala sang face mask ukon physical distancing
- pagbisita sa mga wala nakapabakuna nga mga tawo sa puluy-an nga may manubo nga risgo sang severe COVID-19 disease
- kag papangindi sa quarantine kag testing sa tion nga asymptomatic man lang ukon wala sang sintomas sang COVID-19
Good news man ini para sa mga nakapabakuna nga mga Lolo kag Lola.
Ini bangud, apisar wala sang mask kag physical distancing, pwede na nila mabisita ang wala nabakunahan nga mga apo kag kabataan SA KONDISYON nga wala sang myembro sang pamilya ang may risgo sa malala nga COVID-19 infection.
Sa subong, santo sa report sang CDC, kapin 9 percent na sang US population ukon 30 million ka tawo ang nakakumpleto na sang vaccination.
