Viral subong sa social media ang makatalandog-balatyagon nga ginhimo sang isa ka madre nga pagluhod sa atubang sang pulis kag militar sa Myanmar samtang nagapakitluoy nga indi pagdalahigon ang mga kabataan sa pinatyanay kag kinagamo sa amo nga pungsod.
Isa ka majority-Buddhist country ang Myanmar gani gindayaw sang kadam-an nga tawo ang ginhimo sang Catholic nun nga si Sister Ann Rose Nu Tawng.
Suno kay Sister Ann, nagluhod siya kag nag-apelar sa armado nga pulis kag militar nga indi pagluthangon kag indi pag-i-torture ang mga kabataan, kag sa baylo, siya na lang ang patyon.
Yara sa gihapon ang Myanmar sa tunga sang tuman ka lapnagon nga hublag-protesta kag kinagamo matapos ginpatuman ang kudeta sang nagligad nga Pebrero 1.
May kaangtanan diri, naggwa man ang mga protesters sa dalanon sa Myitkyina, capital sang Kachin state, samtang nagasuksok sang matig-a nga mga kalo kag nagabitbit sang mga taming.
San amo nga adlaw suno kay Sister Anne, nagsunod man ang mga pulis kag gintinguhaan sang mga madre nga tabugon sila.
Sunod nga ginlagas sang mga pulis ang bataon nga mga protesters gani nga wala na sang nahimo si Sister Anne kundi ang magluhod sa atubang sang mga pulis.
Pila ka segundos ang nagligad, nagpangluthang ang pulis gani nagdinalagan ang mga kabataan.
Suno kay Sister Anne, nakit-an niya ang naigu sa ulo ang isa ka lalaki kag sunod amo ang paggamit sang pulis sang tear gas.
Sa amo nga protesta, ginkumpirma sang rescue team nga duha ka lalaki ang naluthangan-patay apang wala sang kumpirmasyon kun live rounds ukon rubber bullets ang gingamit.
Sa subong, santo sa record sang Assistance Association for Political Prisoners monitoring group, masobra na sa 60 ka tawo ang napatay sa Myanmar bangud sang ginapatigayon nga hublag protesta batok sa militar kag ginpatuman nga kudeta.
