Makabaton na sang COVID-19 vaccines ang mga naga-edad 16 anyos pataas sa Alaska — ang labing una nga estado sa America nga nagkakas sang eligibility requirements sa mahimo mabakunahan.
Gin-anunsyar mismo ni Republican Governor Mike Dunleavy ang panibag-o nga pagsulundan para sa 730,000 ka mga pumuluyo.
Masobra isa na ka quarter sang mga Alaskans ukon masobra 25% sang populasyon ang nakabaton na sang isa ka shot sang bakuna.
Nahibaluan nga ang COVID-19 vaccines nga gindevelop sang Moderna kag Johnson & Johnson ang aprubado lang sa mga tawo nga naga edad 18 pataas apang sa mga pamatan-on, mahimo sila makabaton sang Pfizer vaccine.
Nagalaum si Dunleavy nga mas madamo pa nga mga lugar ukon pungsod ang maka-umpisa na sang pagpang bakuna agud mabuhi liwat ang industriya sang turismo samtang nagahilapit na ang summer.
Sa subong, masobra 123 million doses sang COVID-19 vaccines na ang nahatag sa United States sa diin 93.7 million shots na ang nabakuna.
