GUIMARAS – Ginpasakaan na sang formal complaint ang 11 tanan ka mga natumod nga suspek nga amo ang lunsay myembro sang illegal fishers nga nagpangkastigo kag nag-abduct sa katapo sang Bantay Dagat sang nagpatigayon ang mga ini sang sea patrol operation sa Nueva Valencia, Guimaras.
Ang biktima amo si Nelson Bordon, residente sang Barangay Guiwanon, Nueva Valencia.
Sa interview sang Bombo Radyo kay Police Master Sgt. Orlando Castillano, chief investigator sang Nueva Valencia, Municipal Police Station, iya ginpahayag nga nagserbe bilang prime witness sa insidente si Claudio Buencochillo, isa sa mga nakaupod ni Bordon sang Pebrero 24 sang natabo ang engkwentro sa tunga sang Bantay Dagat Task Force kag sang illegal fishers nga ginapahayag taga-Negros Occidental.
Suno kay Castillano, sa 11 ka mga nalakip sa ginpasakaan sang reklamo, pito diri ang na-identify na ang pangalan santo sa crew list nga ila nasecure nagikan sa Philippine Coast Guard – Hinigaran Substation, Negros Occidental.
Ginpahayag ni Castillano nga natumod mismo sang witness nga si Buencochillo ang fishing vessel nga nakit-an sa Purok 2, Barangay Poblacion sa Hinigaran, Negros Occidental nga may pangalan nga Princess Analayna 3, nga may duag green kag yellow.
Gintuad man suno kay Castillano sang amo nga witness nga gintuyo man siya nga patyon sang mga illegal fishers apang nakalumpat sila sang duha pa niya ka kaupod nga bantay dagat gikan sa fishing vessel sang amo nga illegal fishers.
Samtang nabilin naman si Bordon kag didto ginpulihan sang mga illegal fishers nga amo ang ginapahayag mga suspek.
Pebrero 27 sang nasapwan nga nagautaw-utaw ang bangkay ni Bordon sa baybayon nga sakop sang Malingin Island sa Barangay Guiwanon.
Santo man sa autopsy result, indi pagkalumos kundi mga pilas bunga sang pagkastigo ang rason sang kamatayon sang biktima.
Sa subong suno kay Castillano, ginahulat pa ang counter affidavit nga ipasa sang at large nga mga suspek.
Pakamaayuhon man suno kay Castillano nga indi anay pag-i divulge ang pangalan sang pito ka identified suspects samtang wala pa natapos ang preliminary investigation.
Sa tion nga may makita nga probable cause ang Guimaras Provincial Prosecutor’s Office, mahimo nga pasakaan sang kaso ang 11 ka mga suspek sa diin posible nga maga-issue naman ang Korte sang Warrant of Arrest.
