ILOILO CITY- Tinguhaan sang Department of Public Works and Highways nga mapadasig kag mapalip-ot ang isa ka semana nga temporaryo nga pagsirado sang dalan nga sakop sang construction site sang Ungka II flyover sa Pavia, Iloilo nga maga umpisa sa Marso 15 tubtob Marso 21.
Ini may kaangtanan sa natalana nga installation sang beams ukon girders para sa ginatukod nga flyover.
Sa interview sang Bombo Radyo kay Engr. Jose Al Fruto, Assistant Regional Director sang Department of Public Works and Highways Region 6, iya ginpahayag nga 32 tanan ka mga girders ang iga-install sa sulod sang pito ka adlaw.
Suno kay Fruto, apisar apat ka girders lang ang naplano nga i-install kada adlaw , tinguhaan nila nga himuon ini nga lima tubtob anom ka girders ang mainstall umpisa alas -siete sa aga tubtob alas-singko sa hapon agud nga mangin lima tubtob anom ka adlaw na lang ang road closure.
Ginpasiguro man ni Fruto nga mangin passable sa pag-abot sang alas-singko sang hapon ang amo nga dalan.
Gin-athag man sang natungdan nga ang temporary road closure ang para man sa seguridad sang mga motorista ka publiko agud malikawan ang aksidente.
Samtang, kadungan sang temporaryo nga road closure sa diin apektado ang dalan sa Ungka II Circumferential Road intersection pakadto sa U-turn slot sang exit sang Christ the King, ginaabisuhan ang publiko kag salakyan nga padulong sa syudad nga maglabay sa alternatibo nga ruta.
Sa interview sang Bombo Radyo kay Mr. Jeck Conlu, head sang Public Safety and Transportation Management Office, iya ginpahayag nga naplastar na ang alternatibo nga ruta nga mahimo malabanan sang mga motorista.
Mahimo nga magliko pa-too sa Circumferential Road pakadto sa Brgy. Jibao-an, Pavia pakadto sa Mandurriao; mahimo man magliko pa-wala sa Circumferential Road, pakadto sa Brgy. Tacas, pakadto sa Quintin Salas, diretso sa Jaro Plaza; ukon magliko pa-wala sa Circumferential Road, pakadto sa Brgy. Tacas, pakadto sa Buhang diretso sa Jaro Plaza.
Mahimo man maglabay sa Pagsanga-an, Pavia pakadto sa Brgy. Tacas pakadto sa Quintin Salas diretso sa Jaro Plaza ukon maglabay sa Aganan, Pavia pakadto sa Jibao-an (Bangga Singko), pakadto sa Mandurriao.
Ang mga salakyan naman nga naghalin sa Iloilo City padulong sa Pavia ang mahimo maglabay sa sini nga mga ruta: Quintin Salas pakadto sa Brgy. Tacas pakadto sa Pagsangaan (Pavia Road); Quintin Salas pakadto sa Brgy. Tacas pakadto sa Circumferential Road pakadto sa City Mall (Pavia) diretso sa Pavia Road; kag Jaro pakadto sa Mandurriao, pakadto sa Jibao-an, pakadto sa Circumferential Road,lapos sa Ungka II ,direkta sa Pavia Road.
Nagpangayo naman sang paghangop si Conlu sa publiko bangod sa huol nga madala sang nasambit nga temporary road closure.
