Madamo sang mga lamharon sa United Kingdom ang nagasuporta kanday Prince Harry kag asawa sini nga si Meghan Markle.
Ini ang kasunod sang nangin pahayag ni Meghan sa interview nila kaupod ang iya bana nga si Prince Harry kay Oprah Winfrey nga antes siya nagbun-ag kay Archie, ginhambalan na sila nga indi paghatagan sang titulo sang royal family ang ila anak bangud sa mga huring-huring sa duag sang supat sang bata.
Suno kay Bombo International Correspondent Ramil Isogon, direkta sa United Kingdom, iya ginpahayag nga tunga ang nangin reaksyon sang mga pumuluyo sa diin may yara sang nagpabutyag sang simpatiya sa duke kag duchess sang Sussex kag may yara man sang nagasuporta sa nangin pahayag sang Royal Family nga indi matuod nga ‘racist’ ang ila pamilya.
Suno kay Isogon, kadam-an sa mga nagasimpatiya sa mag-asawa nga sanday Prince Harry kag Meghan Markle amo ang mga naga-edad 18 tubtob 24.
Samtang, lunsay senior citizens naman ang hugot nga nagasuporta sa British royal family nga nagpahayag nga wala sang kamatuoran nga ‘racist’ ang ila pamilya.
Matandaan nga gindepensahan ni Prince William ang British royal family matapos gin-akusaran sila sang “racism” sang iya utod nga Prince Harry kag asawa sini nga si Meghan.
