ILOILO – Pilason ang isa ka pulis matapos ginpalukpan sang improvised explosive device (IED) ang patrol car sang Lambunao Municipal Police Station sa Barangay Pughanan, Lambunao Iloilo.
Ang biktima amo si Police Senior Master Sgt. Christopher Losbañes, assign sa Lambunao, Municipal Police Station.
Sa exclusive interview sang Bombo Radyo kay Losbañes, iya ginpahayag nga magapatigayon kuntani sila sang follow up investigation sa Brgy. Panuran, Lambunao, Iloilo sa diin may engkwentro nga nagluntad batok sa mga ginapatihan myembro sang New People’s Army (NPA).
Suno kay Losbañes, sang yara na sila sa Barangay Pughanan, tuman ang ila kakibot sang gilayon nga naglupok ang IED sa tunga sang dalan sa diin nagsalangisag pa ang pagmaneho sang ila driver kag nadagdag sa pil-as ang ila patrol car.
Nagkinaran-karan naman ang mga tawo suno kay Losbañes sa diin nagbwelta man sila paarak-luthang sa mga gina-alegar rebelde nga amo ang nagpalupok sang landmine.
Ginpahayag sang pulis nga nabatyagan nalang niya nga nagabiring na ang iya nawala nga kamot kag nakita nga nagdugo na ini tuga sang pagwas-ag sang mga shrapnel halin sa IED.
Dugang pa niya, may naglubong pa nga gamay nga shrapnel sa iya nawala nga kamot.
