Trending subong sa social media ang video sang isa ka Black American nga ginsinggitan kag ginpahog ang isa ka Pinoy sa sulod sang tren sa Amerika matapos masal-an nga Chinese.
Ang nasambit nga Pinoy amo si Bombo International Correspondent Alex Vidal, direkta sa New York.
Sa interview sang Bombo Radyo kay Vidal, iya ginpahayag nga nagapungko siya sa tren sang gintulok siya sang masakit sang wala ginpangalanan nga black American kag didto na gin-insulto kag ginsinggitan.
Suno kay Vidal, sa pihak sang kakulba niya bangud sa posibilidad nga pintasan siya sang nasambit nga Amerikano, nagpabilin siya nga kalmado kag ginkuhaan sang video ang ginahimo sini.
Nagpasalamat naman si Vidal bangud wala sang malain nga natabo sa iya.
Nagahatag man ini pahanumdom suno kay Vidal sa iban nga Asyano nga maghalong kag magpangaman bangud sa lapnagon nga diskriminasyon ilabi na sa mga Asian American.
Magluwas diri, madamo na suno kay Vidal sang nagakatabo nga krimen batok sa mga Asian American nga iya man personal nga nakit-an sa diin ginamulay kag ginasakit ang mga ini, ilabi na ang mga asyano nga nagakasal-an Chinese kaangay niya.
Una na nga ginkondenar ni President Joe Biden ang diskriminasyon sa Asian Americans sa tunga sang COVID-19 pandemic sa iya pinakauna nga national address.
Suno kay Biden, nagakadapat nga nagabuligay ang mga Americans, apang baliskad ini sa realidad sa diin madamo sang krimen nga nagaluntad batok sa Asian Americans.
Lakip sa masami nga naeksperyensyahan sang mga asyano amo ang pagpang-atake, harrassment kag pagbasol bangud sa COVID-19.
“At this very moment, so many of them, our fellow Americans, are on the front lines of this pandemic trying to save lives and still — still are forced to live in fear for their lives just walking down streets in America,” he said. “It’s wrong, it’s un-American, and it must stop,” pahayag ni Biden.
Samtang, sang Enero nag pirma na si Biden sang memorandum nga nagapakamalaot sang diskriminasyon sa Asian American kag Pacific Islander community sa tunga sang COVID-19 pandemic.
