ILOILO – Hugot nga ginatutukan sang Local Government Unit (LGU) sang Lambunao, Iloilo ang away batok sa insurhensya.
Ini ang kasunod sang pila ka mga engkwentro nga nagluntad sa amo nga banwa nga ginapahayag ginapangunahan sang mga rebelde.
Sa exclusive interview sang Bombo Radyo kay Lambunao, Iloilo Vice Mayor Arvin Losaria, iya ginpahayag nga sang nagligad nga tuig, natumod nila nga ang Barangay Agsirab, Cabatangan kag Panuran sa amo nga banwa amo ang pugad sang rebelde nga grupo.
Suno kay Losaria, antes natabo ang pagpalupok sang improvised explosive device (IED) sa patrol car sang Lambunao Municipal Police Station, nakakadto pa ang LGU sang Lambunao, Iloilo sa Barangay Pughanan agud maghatag sang bulig sa mga residente.
Gin-ako sang natungdan nga ginakondenar nila ang nasambit nga engkwentro sa diin napilasan pa ang isa ka pulis kag isa ka barangay kagawad.
Bangud diri suno kay Losaria, padayon sila nga nagapakig-angot sa Iloilo Provincial Government agud makabuligay sa paghatag sang solusyon sa nagakatabo nga mga engkwentro sa banwa sang Lambunao, Iloilo.
Nagapati man ang natungdan nga ang alagyan padulong sa economic development amo ang economic peace.
May kaangtanan diri, nagpanawagan man ang bise alkalde sa pumuluyo sang Lambunao, Iloilo nga magkooperar sa LGU agud madasig nga matapna ang lapnagon nga insurhensya.
