Nagpanugyan ang abogado sa publiko nga sundon ang mando sang Philippine National Police (PNP) nga dumilian ang public display of affection (PDA) agud malikawan ang pagtaas sang COVID-19 cases.
Sa exclusive interview sang Bombo Radyo kay Atty. Doni Almio, member of the board sang IBP-Iloilo Chapter, iya ginpahayag nga ang PDA amo ang paghalukanay, pagholding hands, pakup-anay kag iban pa nga physical connection sa pampubliko nga lugar.
Suno kay Almio, sang nagpaggwa sang joint resolution 11 kag 12 ang Inter-Agency Task Force nga nagamando sang physical distancing, nalakip man diri ang pagdumili sang PDA.
Ini nga pagsulundan suno sa natungdan ang para sa kaayuhan sang tanan kag indi lamang para sa isa ka tawo ukon isa ka sektor.
Gin-ako man ni Almio nga bilang isa ka abogado, pabor siya sa nangin tikang sang PNP nga dumilian ang PDA bangud makabulig ini agud dalayon na nga matapna ang COVID-19.
Mas maayo suno sa iya nga magsunod nalang ang tanan sa pagdumili sang PDA bangud ini ang isa lamang sa mga pamaagi nga ma proteksyunan ang kaugalingon sa paglatnanay sa COVID-19.
