ILOILO – Natigayon na nga malubong ang bangkay ni Vivencio Bennedick Dequilla Jr., 63, father founder sang Psi Sigma Phi Philippines Incorporated.
Matandaan nga nasapwan nga patay si Dequilla sang Martes, Marso 2, sa katubuhan sa Brgy. PD Monfort North, Dumangas, Iloilo nga yara na sa advanced state of decomposition apang sang Marso 5 lang natumod ang iya identity.
Sa interview sang Bombo Radyo kay alyas Beth, pakaisa sang biktima, iya ginpahayag nga nagasinggitan sa gihapon ang ila pamilya sang hustisya sa brutal nga kamatayon sang ila himata.
Suno kay Beth, tuman ka mabuot kag may bulawanon nga tagipusuon ang iya pakaisa.
Isa gihapon ka dako nga palamangkutanon suno kay Beth sa ila pamilya kun sin-o ang sa likod sang pagpatay kay sa iya pakaisa kag kun ano ang motibo sang krimen.
Apang suno kay Beth, wala sila nagakadulaan sang paglaom nga mahatagan sang nagakaigo nga hustisya ang iya nga pakaisa.
Nahibaluan may P100,000 nga padya ang sin-o man nga makatudlo sa suspek nga nagpatay kay Dequilla.
Ang reward money ang gintanyag sang utod ni Dequilla nga si Vivencio Siaotong Dequilla III.
