Negative nga RT-PCR test, iga-require 72 hours antes ang travel sa Western Visayas

Nahisugtan sang local chief executives sang Western Visayas ang Uniform nga Travel Protocol.

Ini ang kasunod sang ginpatigayon nga emergency meeting sang tanan nga local chief executives sa Western Visayas kaupod ang Department of Health (DOH) kag Department of the Interior and Local Government (DILG) Region 6.

Sa interview sang Bombo Radyo kay Iloilo City Mayor Jerry Treñas, iya ginpahayag nga bangud sang lapnagon nga pagsaka sang COVID-19 cases sa Metro Manila kag Cebu, ginpakamaayo nila nga mangin uniform ang pagsulundan sa Travel Protocol sa mga magasulod sa Western Visayas.

Bangud diri suno kay Treñas, i-require sa mga byahero ang pagpaidalom sa Reverse transcription polymerase chain reaction (RT-PCR) sa sulod sang 72 ka-oras antes ang schedule sang byahe.

Ginpahayag sang natungdan nga magasapol sila liwat via zoom meeting sang mga local chief executive sa Western Visayas sa Byernes, Marso 19 agud nga ma-assess ang sitwasyon.