Ginahulat nalang sang Regional Anti-Cyber Crime Unit (RACU) sang Police Regional Office (PRO) 6 ang formal complaint sang ginhingadlan nga pito ka police personnel nga amo ang ginapahayag yara sa likod sang riding-in-tandem killings sa Syudad sang Iloilo.
Matandaan nga gin-upload ang video sa YouTube sang Marso 2, 2021 nga may tig-ulo nga Iloilo City Riding in Tandem Killings.
Sa interview sang Bombo Radyo kay Patrolman Emerito Frutas Jr., Public Information Officer sang RACU Region 6, iya ginpahayag nga ang YouTube lamang ang may gahom nga magtrace kag maghatag sang impormasyon sa ila sang matuod nga identity sang nag-upload sang video.
Gin-ako sang natungdan nga apisar nakahibalo sila kun paano magtrace sang uploader sang nasambit nga video, indi nila ini paghimuon bangud paglapas ini sa data privacy act.
Suno kay Frutas, nagakadapat nga makapasa sang pormal nga reklamo ang mga biktima nga pulis sa YouTube agud mapamatud-an nga may yara sang libelous act ang nag-upload sang video.
Dugang pa sang natungdan, sa tion nga matumod ang suspek nga amo ang utok sa paghimo kag pag-upload sang video sa YouTube, mahimo ini pasakaan sang kaso nga paglapas sa Republic Act 10175 ukon Cybercrime Prevention Act of 2012.
MAGAPASAKA SANG KASO
Samtang, ginkumpirma naman sang mga pulis nga nangin biktima sa video sa Youtube nga amo ang ginatudlo mga suspek sa Iloilo City Riding in Tandem Killings, nga magapasaka sila sang reklamo ukon formal complaint.
Sa interview sang Bombo Radyo kay PLt. Col. Joem Malong, spokesperson sang PRO 6, iya ginpahayag nga nakaistorya siya sa isa sa pito ka mga police nga ginhingadlan sa nasambit nga video.
Suno kay Malong, gin-athag sang amo nga pulis nga magapatigayon sila sang imbestigasyon tubtob matumod ang sa likod sang ginapahayag ‘malisyoso’ nga video nga gin-upload sa YouTube.
Apang suno kay Malong, wala pa siya sang ideya kun san-o magapadulong sa RACU Region 6 ang pito ka pulis agud maghatag sang ila formal complaint.
