Nagpagwa sang bag-o nga pagsulundan sa pagbyahe ang National Task Force against COVID-19 (NTF) agud matapna ang padayon nga pagtimbuok sang kaso sang COVID-19 sa pungsod.
Sa idalom sang Memorandum Circular no. 5 series of 2021, nasaad nga temporaryo nga indi pagpasudlon sa Pilipinas ang magapauli nga Foreign Nationals, Returning Overseas Filipinos (ROFs), kag non-Overseas Filipino Workers (OFW).
Sa interview sang Bombo Radyo kay Ma. Aletha Nogra, spokesperson sang Regional Taskforce for COVID-19, iya ginpahayag nga ang nasambit nga pagsulundan ang maga-umpisa sa Sabado, Marso 20 tubtob Abril 19.
Suno kay Nogra, ginmanduan ang mga ahensya sang gobyerno nga limitahan anay ang numero sang inbound international passengers sa 1,500 kada adlaw.
Yari naman ang mga exempted sa entry ban nga nasaad sa Memorandum Circular No. 5:
- Holders sang 9(c) visas kaangay sang seaman ukon mga nagatrabaho sa international shipping line
- Medical repatriation, nga gin-endorso sa traveler sang Department of Foreign Affairs (DFA) kag Overseas Workers Welfare Administration (OWWA)
- Distressed nga ROFs nga nakaesperyensya sang problema kag gin-endorso sang DFA kag OWWA
- Emergency, humanitarian, kag iban pa nga analogous cases nga aprubado sang National Task Force Against COVID-19.
Matandaan nga una na ginpahayag ni Nogra nga magapasa sang request ang mga local chief executives sang Western Visayas sa National Inter-Agency Task Force agud hingyuon nga i-require ang negative reverse transcription polymerase chain reaction (RT-PCR) test result para sa mga byahero nga magasulod sa rehiyon.
Ang amo nga RT-PCR test result ang kinahanglan i-secure within 72 hours antes ang petsa sang byahe.
