ILOILO – Gin-ako sang arestado sa natabo nga engkwentro kahapon sa Barangay Mañacabac, Janiuay, Iloilo, nga indi na siya aktibo sa New People’s Army (NPA).
Ini amo si Nena Fernando alyas ‘ka Bing’, 66 anyos, residente sang Brgy. Ara-al, La Carlota City, Negros Occidental, apang temporaryo nga naga-istar sa Barangay Mañacabac, Janiuay, Iloilo.
Sa exclusive interview sang Bombo Radyo kay Fernando, iya gin-ako nga nangin myembro siya sang NPA sang naga-istar pa siya sa Negros Occidental kag didto nagapatigayon man sila sang hublag-protesta batok sa gobyerno kag militar.
Apang sa subong, indi na siya aktibo bangud tigulang na ini kag indi na siya makasarang magbitbit sang mga armas.
Matandaan nga nagpatigayon ang 301st Infantry Brigade sang Philippine Army sang operasyon kaupod ang 12th Infantry Battalion sang Philippine Army matapos makabaton sang impormasyon nga nagapanago ang mga rebelde sa nasambit nga lugar.
Sang ginpadulungan nila ang lugar, didto na kag naengkwentro nila ang mga rebelde kag naaresto si Fernando.
