‘Di bala kanami sa pamatyag nga mabakal mo ang mga gamit nga imo naluyagan gamit ang imo sweldo sa pagpanikasog sa trabaho?
Apang indi tanan ang mapalaron ilabi na subong nga kadam-an sa mga Filipino ang wala sang trabaho bangud sa pandemya.
Kag kun wala ikaw sang trabaho, indi malikawan nga mangayo kita sang bulig sa aton nga ginikanan.
Apang indi man siguro maglab-ot sa punto nga ma-mandu ka mismo sa inyo mga ginikanan nga suportahan kafinancially tubtob sa ulihe ‘di bala?
Ini ang natabo sa isa ka 41 anyos nga lalaki sa United Kingdom sa diin gindala pa niya sa korte ang iya mga ginikanan agud lang nga pwersahon ini nga suportahan siya pinansyal bangud wala siya sang trabaho.
Si Faiz Siddiqui ang nagtapos sang iya pag-eskwela sa Oxford University kag gin-ako man niya nga tuman siya ka dependent sa iya nga mga ginikanan.
Nagapati ang lalaki nga malapas ang iya tawhanon nga kinamatarong kun utdon na sang iya mga manggaranon nga ginikanan ang pagsuporta sa iya.
Humalin sang 2011, wala nakatrabaho si Faiz kag nagatinir lamang ini sang libre sa apartment nga ginabaydan sang iya mga ginikanan sa balor nga $1.4 million kag nagabaton man siya sang $550 kada semana bilang allowance.
Apang nadesisyonan sang ginikanan nga tapuson na ang paghatag sang kwarta sa ila anak bangud nag-angkon sila sang seryoso nga argumento.
Indi lamang ini ang labing una nga reklamo ni Faiz nga gindala niya sa korte bangud mangin ang Oxford University ang iya man nga ginreklamo bangud sa ginapahayag niya nga wala nagahatag sang insakto nga pagtuon ang nasambit nga eskwelahan.
