ILOILO CITY – Hugot nga ginpanugyan sang COVID-19 Team sang Iloilo City Government sa mga pumuluyo sang syudad sang Iloilo nga magsunod sa mga health protocol bisan yara sa sulod sang balay.
Ini ang kasunod sang lapnagon nga household clustering sang COVID-19 cases ukon paglatnanay sang COVID-19 sa sulod sang balay nga narekord sa pila ka barangay sa Iloilo City.
Sa interview sang Bombo Radyo kay Mr. Jeck Conlu, spokesperson sang COVID-19 Team, iya ginpahayag nga ila ginakabalak-an ang pagsaka sang household clustering infections.
Suno kay Conlu, nagsaka pa sa 18 ang numero sang mga nagpositibo sa COVID-19 nga narekord sang Marso 16 sa diin ini ang lunsay family clustering.
Kun pahat-pahaton ang 18 ka nagpositibo sa COVID-19 nga makabig nga household clustering:
- Calaparan, Arevalo, Iloilo City – apat ka kaso
- Bolilao Mandurriao, Iloilo City – tatlo ka kaso
- San Rafael, Iloilo – tatlo ka kaso
- Q. Abeto St. Mandurriao, Iloilo City – duha ka kaso
- South Fundidor Molo, Iloilo City – duha ka kaso
Samtang tig-isa naman ka kaso sang COVID-19 ang narekord sa mga masunod nga lugar:
- Brgy. Dungon B, Jaro, Iloilo City
- Brgy. Guzman-Jesena Mandurriao, Iloilo City
- Brgy. Javellana Extension, Jaro Iloilo City
- Brgy. Monica Iloilo City
Ginpahayag ni Conlu nga indi man sila mag-untat sang pagpahanumdom sa mga pumuluyo nga mag-obserba sang minimum health protocol bangud isa ini ka dako nga pamaagi nga matapna ang pagsaka sang COVID-19 cases.
