Nagpanawagan ang Alliance of Concerned Teachers (ACT) sa Department of the Interior and Local Government (DILG) nga gilayon nga bawion ang pagdeklarar nga front sang komunista ang ila grupo.
Nahibaluan nga nasaad sa memorandum sang DILG nga pirmado ni DILG Asst. Secretary Alexander Macario nga imbestigahan ang infiltration sa mga ahensya sang gobyerno sang communist terrorist group front organization nga ACT lakip na ang Confederation for the Unity, Recognition, and Advancement of Government Employee (COURAGE)- Panay kag pahalinon ang mga empleyado nga may kaangtanan sa terorista nga grupo.
Sa interview sang Bombo Radyo kay Maximo Montero, presidente sang ACT Region 6 Union, iya ginpahayag nga ginapakamalaot sang ila grupo ang wala sang basehan, makahaladlok kag makakulugmat nga pagpangred tag sang DILG.
Suno kay Montero, ang nasambit nga tikang sang DILG ang nagalapas sang kinamatarong sang mga manunudlo kag tanan nga mamumugon sa sektor sang edukasyon.
Bangud sini suno kay Montero, mahimo man maapektuhan ang nakaandan nga buluhaton sang mga manunudlo nga amo ang ginakabig bilang education fontliners sa tunga sang COVID-19 pandemic.
Ginpaathag sang natungdan nga ang ginaduso lamang sang ila nga union kag padayon nga ginapakigbato, amo ang mahatagan sila sang dugang nga benepisyo kaangay sang political kag economic rights.
Ginhangkat man ni Montero ang mga local government officials nga nagasuporta sa kawsa sang edukasyon nga magpahayag man sang ila panindugan batok sa ginapahayag wala basehan nga red tagging sang DILG.
