Nagdangat na sa 16, 329 ka mga health workers sa Western Visayas ang nabakunahan batok sa COVID-19.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang Department of Health Region VI, iya ginpahayag nga ini nga numero ang katumbas sang 56.63% sang 28,837 ka health workers nga target nga bakunahan sa Rehiyon VI.
Nahibaluan nga 23,580 tanan ka doses sang COVID-19 vaccines ang nabaton sang DOH Region VI nga ginalakipan sang bakuna halin sa Sinovac kag AstraZeneca.
Ang first dose sang amo nga mga bakuna ang gin-distribute na sa nanuhay-tuhay nga ospital sa Rehiyon VI.
Sa Iloilo City kag Bacolod City, naumpisahan naman sa pagbakuna ang mga frontline healthcare workers nga nagatrabaho sa quarantine kag isolation facilities.
Manugtapos na suno kay Juanico ang first dose vaccination sang Sinovac vaccines kag natalana naman nga ipanagtag ang vials para sa second doses sini.
Bangud may yara sang 28-day interval sa first dose kag sa second dose sang Sinovac vaccine, ginalauman nga matabo ang vaccination sang ikaduha nga dose sa Abril 2.
Santo sa directive sang National Immunization Technical Advisory Group (NITAG), ang AstraZeneca vaccines naman ang may interval nga 8-12 weeks sa pagtublok sang una kag ikaduha nga dose.
Suno kay Juanico, ang duha ka nasambit nga COVID-19 vaccine brand ang may yara lamang sang anum ka bulan nga shelf life.
Apang santo sa ‘actual expiry date from the manufacturing date’, ang Sinovac COVID-19 vaccine ang maga-expire sa Hunyo 2021 samtang ang AstraZeneca vaccines naman ang mag-expire sa Mayo 31, 2021.
May mandu man halin sa central office sang DOH nga idistribute gilayon ang nabaton nga mga bakuna.
Samtang, ginahulat na lang sang Department of Health Region VI ang official operational guidelines nagikan sa National Immunization Technical Advisory Group (NITAG) agud maubos na panagtag para sa 10,000 ka health workers sa rehiyon ang 10,000 doses sang AstraZeneca COVID-19 vaccines.
Ang inisyal nga plano amo nga ipain para sa 5,000 ka health workers ang amo nga bakuna kun sa diin 5,000 ang gamiton sa first dose kag 5,000 ang gamiton sa ikaduha nga dose.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang Department of Health Region VI, iya ginpahayag nga may direktiba naman sila nga nabaton nagikan sa central office sang DOH nga ubuson na lang anay sa first dose ang tanan nga bakuna sang AstraZeneca.
Suno kay Juaico, santo sa general nga pagpatuman sang procedure sa vaccination, walo ka semana ang interval antes matublok ang ikaduha nga dose sang nasambit nga bakuna.
Ginpahayag man ni Juanico nga anum ka bulan ang shelf life sang vial sang AstraZeneca apang kun basehan ang ‘actual expiry date from the manufacturing date’, maga-expire ang amo nga bakuna sa Mayo 31, 2021.
