ILOILO CITY- Hugot nga ginabalabagan sang mga fisherfolks sa banwa sang Dumangas ang plano nga pagpatukod sang oil depot sang Grayhorse Energy Inc. sa 10-ektaryas nga lote sa Talusan, Dumangas, Iloilo.
Sa interview sang Bombo Radyo kay Mr. Tomas Hautea, presidente sang Iloilo Fish Producers Association, iya ginpahayag nga dako nga risgo sa ila palangabuhian kag sa dunang manggad ang dala sang amo nga oil depot.
Suno kay Hautea, isa sa ginalantaw nga posible nga matabo amo ang oil leakage.
Pahayag sang natungdan, sa tion nga matabo ini, indi lang ang ang barangay Talusan ang apektado kundi maapektuhan man ang barangay Sapao, Ermita, Patlad, Cayos, Bantud Fabrica sa amo nga banwa kag malab-ot man ang Zarraga kag Leganes.
Dugang pa niya, indi niya luyag nga sa ulihi, ang tanan nga seafoods sa lugar ang may baho kag may sabor sang asayti.
Nagpanugyan man ini nga mas maayo nga pasangkaron sang banwa ang fishing industry sa lugar bangud masarangan sini buhion ang ekonomiya bisan wala sang presensya sang oil depot.
