ILOILO – Hugot ang pagpati ni Iloilo Governor Arthur Defensor nga malampuwasan sang probinsya kag mangin sang bug-os nga kalibutan ang COVID-19 pandemic.
Sa interview sang Bombo Radyo kay Governor Defensor, iya ginpahayag nga mas nag-alam na subong ang mga tawo kag mga pamunuan kun paano solusyunan ang COVID-19.
Suno kay Defensor, mas plastado na subong ang mga health protocol, quarantine procedures, kag may yara na sang pila ka mga molecular laboratory kag quarantine facilities sa Iloilo Province.
Apisar sini suno sa gobernador, indi man mahimo nga madula gilayon ang COVID-19 bangud ini ang bag-o nga sahi sang balatian kag padayon pa nga ginatun-an ang pat-od nga bulong batok diri.
Ang importante lamang suno kay Defensor amo nga nakahibalo na ang kadam-an kun paano atubangon ang ini nga sahi sang pagpanghangkat.
Nagakadapat man suno sa natungdan nga mas protektahan pa gid ang mga tawo sa palibot kaangay sang mga vulnerable sa COVID-19 kag may yara sang comorbidities ukon nanuhay-tuhay nga balatian.
Dugang pa niya, mas maayo nga mabalanse lamang ang pagsunod sa health protocol samtang ginahatagan man sang pagtamod ang importansya sang ekonomiya.
Liwat man nga nagpanugyan si Defensor sa publiko nga indi pagkalipatan nga magsunod sa quarantine measures kaangay sang pagsuksok sang mask, pagdistansya kag pagpanghinaw sang kamot agud malikawan ang pagtaas sang COVID-19 cases.
