ILOILO CITY – Wala na sang inugbalik nga COVID-19 vaccines ang Department of Health Region VI sa central office.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang DOH Region VI, iya ginpahayag nga naubos na sa pagpanagtag ang tanan nga nag-abot nga bakuna sa Rehiyon VI lakip na ang vials para sa ikaduha nga dose.
Ginpanagtag ang Sinovac kag AstraZeneca vaccines sa selected hospitals kag infirmary sa Western Visayas.
Suno kay Juanico, nagdangat na subong sa 21,174 ka health workers ang natublukan sang bakuna batok sa COVI-19. Ini nga numero ang equivalent sa 73.43% sang 28,837 ka health workers nga target nga bakunahan sa Western Visayas.
Una diri, nagpahayag si Health Secretary Francisco Duque III nga nakabaton siya sang mga suhestyon nga i-‘recall’ kag iredistribute ang limitado nga coronavirus vaccines nga halin sa mga probinsya nga may low infection rates padulong sa mga high risk areas ukon mga lugar nga may nagatimbuok nga kaso sang COVID-19.
Ang gin-identify ni Duque nga posible makabaton sang i-recall nga vaccine supplies amo ang National Capital Region, Cordillera Administrative Region, Calabarzon, Central Luzon, kag Central Visayas.
