Impito kag kaakig, ini ang masami nga gina-ugatan sang isa ka road rage.
Matandaan nga sang nagligad nga semana natabo ang isa ka road rage nga nagresulta sa shooting incident sa tunga sang tatlo ka myembro sang Philippine Army kag isa ka katapo sang Bureau of Jail Management and Penology (BJMP) Region VI.
Ang biktima amo si Jail Senior Inspector Andrew Larupay, 51 kag nagaserbe nga district jail warden sang BJMP sa La Carlota City sa Negros Occidental.
Samtang ang mga suspek naman amo sanday Private First Class Bjourn Kirby Esposo, 26; Staff Sergeant Nelson Sorilla, 40; kag Nilo Silao alias Tata, 47, miyembro sang Citizen Armed Force Geographical Unit (CAFGU).
Sa interview sang Bombo Radyo kay Atty. Joenar Pueblo, iya ginpahayag nga ang road rage amo ang nagaluntad nga mga bayolasyon sa salakyan ukon sirkumstansya sa tunga sang mga tawo sa dalanon nga nagaresulta sa kinagamo ukon krimen.
Ang shootout naman suno kay Pueblo amo ang pagbalusay sang luthang sa tunga sang duha ka tawo ukon grupo gamit ang armas-luthang.
Bangud sini, nagapati ang abogado nga mas maayo nga indi na lamang magdala ang isa ka tawo sang iya lisensyado nga armas-luthang bisan diin, bangud mahimo ini nga maghatag sang kumpyansa sa diin masami nga nagaresulta sa kalainan.
Matandaan nga base sa imbestigasyon sang mga pulis sa nasambit nga road rage, pasakaan sang kaso nga murder ang mga suspek nga sanday Esposo, Sorilla, kag Silao nga lunsay myembro sang Philippine Army.
Gin-athag ni Pueblo nga mahimo pasakaan sang kaso nga murder ang isa ka indibidwal nga nagpatay ukon nagluthang-patay sa isa ka tawo sa tion kag sa tunga sang isa ka pandemya.
