Nagalaum ang maritime industry nga mas mapadasig na ang digitalization sa pagproseso sang application requirements sang mga seafarers nga magabalik sa ila tagsa ka trabaho.
Sa interview sang Bombo Radyo kay Chief Mate Joey Infante, board director kag training Manager sang Stolt Nielsen Philippines Incorporated nga ang negosyo nagalakip sa pooling, planning kag pagpadala sa mga seafarers onboard, iya ginpahayag nga indi magastuhan ang mga seafarers kun indi na sila kinahanglan magpirma sang kontrata sang face-to-face.
Ang nakaandan suno kay Infante amo nga kinahanglan gid magkadto ang seafarer sa mismo opisina sang kumpaniya agud magpirma sang kontrata.
Mas maayo suno sa iya kun mapadala na lang ini via email agud nga makadirekta na ang seaman halin sa ila balay pakadto sa diin man nga lugar abroad para sa sakyan nga sea vessel.
Sa pihak nga bahin, ginapasalamatan sang natungdan ang innovation sang Maritime Industry Authority (MARINA) nga gindala na sa regional offices ang central processing sang requirements sang mga seafarers.
Bangud sini suno kay Infante, indi na nila kinahanglan magpadulong sa Metro Manila agud magproseso sang dokumento kag magkumpleto sa training antes pahanugutan nga makasakay.
Gin-abi-abi man sang natungdan nga may nagdugang nga accredited clinics sa Pilipinas kun sa diin indi na kinahanglan magbyahe sang malayo ang seaman para makumpleto ang medical requirements.
Una diri, nagpahayag man si MARINA Administrator Vice Admiral Robert Empedrad nga padayon sila sa pagpaninguha agud masuportahan kag maproteheran ang welfare sang Filipino seafarers sa tunga sang COVID-19 pandemic.
