Epektibo na subong nga adlaw, Marso 22, ang pagpaidalom sa National Capital Region (NCR) kag apat ka mga kaiping nga probinsya sa General Community Quarantine (GCQ) tubtob sa Abril 4.
Suno kay Presidential Spokesman Atty. Harry Roque, ang Metro Manila kag mga probinsya sang Bulacan, Cavite, Laguna, kag Rizal amo ang mga ginpaidalom sa GCQ status nga may dugang nga mga restrictions kasunod sang pagsaka sang mga panibag-o nga kaso.
Ginpirmahan mismo ni Presidente Rodrigo Duterte ang ini nga rekomendasyon sang Inter-Agency Task Force.
Gin-athag man ni Roque nga wala sang hard lockdown bangud nakabukas sa gihapon ang ekonomiya sa baylo, restriction ini sa hulag sang tawo bangud ginalikawan ang paglapta sang virus.
Pahayag pa ni Roque, daw kaangay nga “bubble” ang matabo sa NCR kag apat ka mga probinsya sa diin otorisado sa gihapon nga makakadto sa nasambit nga mga lugar apang indi mahimo nga makaguwa ukon magkadto sa iban nga mga syudad ukon probinsya nga indi sakop sang GCQ areas kag wala man sang pahanugutan nga makasulod nga naghalin sa iban nga mga lugar.
Agud nga mamonitor sang hugot, may yara sang checkpoints nga ginapahamtang.
Sa Resolution No. 104, yari ang mga nahisugtan sang IATF for the Management of Emerging Infectious Diseases;
*Ang mga essential travel pakadto kag paguwa amo lang ang ginapahanugutan. Apang magapabilin nga operational ang public transportation.
*Tanan nga mass gathering lakip na ang religious gatherings ang ginadumilian.
*Pagpatigayon sang face-to-face meeting ang wala gina-engganyo.
*Pagpatigayon sang kasal, bunyag kag lubong ang limitahan sa 10 ka tawo.
*Ang mga pribado nga sektor ang ginamanduan nga sundon ang kaangay nga mga alternative arrangements nga yara sa executive branch sang government kaangay sang 30-50 percent operational ukon on-site capacity.
*Dine-in restaurants, cafes kag mga establisiemento ang limitado lamang sa delivery, take-out, ukon ano man nga outdoor ukon al fresco dining ang pahanugutan apang nagakadapat nga may yara sang engineering ukon administrative controls nga ginapatuman.
*Pagbisita sa iban nga tawo nga indi sakop sang pamilya ang wala ginapahanugutan.
*Mangin sa balay, dapat nga nakasuksok sang masks ang mga tigulang , vulnurable kag iban pa nga katapo sang pamilya.
Dugang pa ni Roque, ang mga naga-edad 18 anyos panubo kag 65 anyos pataas ang dapat nga magtinir sa balay.
