ILOILO CITY- Gintumod sang chairman sang National Task Force on COVID-19 ang duha ka mayor nga mga rason sang liwat nga pagtimbuok sang kaso sang COVID-19 sa pungsod.
Sa interview sang Bombo Radyo kay Department of National Defense Sec. Delfin Lorenzana, iya ginpahayag nga nagapanguna nga rason amo nga nagakampante na ang mga pumuluyo nga may yara na sang bakuna gani nga wala na ginasunod ang mga minimum health protocol.
Suno kay Lorenzana, isa man ka kabangdanan amo nga mas makalalaton man ang bag-o nga variants sang COVID-19 nga nakasulod sa pungsod.
Bangud sa pagtimbuok sang kaso sang COVID-19 ilabi na sa Metro Manila, ginpahayag sang opisyal nga ginpakamaayo nila nga ilockdown ang tanan nga mga barangay nga may madamo nga kaso sang COVID-19.
Nahibaluan nga epektibo man subong nga adlaw, Marso 22 tubtob sa Abril 4, ang pagpaidalom sa National Capital Region (NCR) Bulacan, Cavite, Laguna, kag Rizal sa General Community Quarantine (GCQ) kasunod sang pagsaka sang mga panibag-o nga kaso sang COVID-19.
