ILOILO CITY- Balik na sa regular nga ruta ang byahe sang mga salakyan matapos ang isa ka semana nga temporary road closure sa area nga sakop sang construction site sang Ungka II flyover sa Pavia, Iloilo.
Marso 15 tubtob Marso 21 sang ginpatuman ang temporary road closure agud hatagan ligwa ang installation sang beams ukon girders para sa ginatukod nga flyover sa diin 32 tanan ka mga girders ang gin-install sa sulod sang pito ka adlaw.
Nahibaluan nga naapektuhan ang dalan sa Ungka II Circumferential Road intersection pakadto sa U-turn slot sang exit sang Christ the King rason nga ginpatuman ang rerouting.
Sa interview sang Bombo Radyo kay Alfredo de Leon,traffic operation officer, iya ginpahayag nga sa subong, ginahulat pa nga matapos ang curing period sang ginpangtakod nga girder.
Suno sa iya, sa tion nga matapos ang curing period kag bag-o nga batch sang girders ang ibutang, liwat na naman nga ipatuman ang temporary road closure apang wala pa ini sang pat-ud nga petsa.
